ស្កុតលែន៖ ក្រសួងសុខាភិបាលស្កុតលែនបានឱ្យដឹងថា មានមនុស្សជាង ១ពាន់នាក់ ត្រូវបានរកឃើញឆ្លង Covid-19 បន្ទាប់ពីអ្នកទាំងនោះបានពាក់ព័ន្ធនឹង អ្នកគាំទ្រដែលទៅទស្សនាការប្រកួត Euro ២០២០ នៃជំនួប រវាងអង់គ្លេស និងស្កុតឡេន នៅកីឡដ្ឋាន Wembley របស់អង់គ្លេស។

ប្រភពដដែលនេះបានអោយដឹងថា មានករណីឆ្លងចំនួនជិត ២,០០០ករណី គឺជាមនុស្សដែលបានធ្វើដំណើរទៅទីក្រុងឡុងដ៍ ដើម្បីទស្សនាការប្រកួតរវាងអង់គ្លេស និងស្កុតឡេននៅកីឡដ្ឋាន Wembley កាលពីថ្ងៃទី១៨ ខែមិថុនាកន្លងទៅ ដែលក្នុងនោះមានអ្នកវិជ្ជមានចំនួន ៣៩៧នាក់ បានឱ្យដឹងថា ពួកគេបានចូលទៅទស្សនាការប្រកួតផ្ទាល់ក្នុងកីឡដ្ឋានតែម្តង។ ក្រៅពីនេះមានអ្នកគាំទ្រមួយចំនួនធំទៀតជួបជុំគ្នាអបអរ និងទស្សនាការប្រកួតតាមផ្ទាំងសំពត់សតាមភោជនីយដ្ឋាន និងបារនានា ខាងក្រៅកីឡដ្ឋាន។

គួរបញ្ជាក់ឱ្យដឹងថា អ្នកគាំទ្រស្កុតឡេនត្រូវបានគេអនុញ្ញាតឱ្យចូលទស្សនាផ្ទាល់នៅ Wembley ក្នុងការប្រកួតនោះតែចំនួន ២៦០០ នាក់ប៉ុណ្ណោះ ប៉ុន្តែជាក់ស្តែងគេជឿជាក់ថា មានមនុស្សប្រមាណ ១ម៉ឺននាក់បានធ្វើដំណើរទៅទីក្រុងឡុងដ៍ ដើម្បីគាំទ្រក្រុមជម្រើសជាតិរបស់ពួកគេដោយផ្ទាល់៕